Suportado sa Provincial Government sa Misamis Oriental ang mulo sa mga apektadong drivers ug operators sa grabeng pagsaka sa presyo sa lana.
Apan gitin-aw ni Celso Abucejo, Special Assistant to the Governor nga dili mahimong masuspenso ang trabaho sa kapitolyo tungod lamang sa ilusad nga transport holiday sa pipila ka mga transport cooperatives sa probinsya.
Sa pagkakaron, lakip sa gitutukan ni Governor Juliette Uy ang mga magtutungha sa kolehiyo nga maapektuhan ang klase kay walay masakyan padulong sa ilang mga tunghaan.
Usa sa pananglitan ang mga nangiskwela sa Misamis Oriental Institute of Science and Technology (MOIST). Gimando ni Uy sa Provincial Disaster Risk Reduction and Management Office (PDRRMO) nga makigkoordinar sa mga mayor sa munisipalidad ug mga lungsod kung unsa ang estado sa transportasyon.
Hinoon nalipay ang gobernador sa pakisayud nga dili mulusad sa transport holiday ang mga modernized jeep nga iya sa Donsal Motors.
