CAGAYAN DE ORO CITY – Gisusi pa sa Scence of the Crime Operatives o SOCO kuyog ang Explosive Ordance Disposal o EOD kon unsa nga klase eksplosibo ang mibusikad sa kusina nga bahin sa usa ka pinuy-anan nga nag-resulta sa kamatayon sa grade 5 pupil sa Purok 3,Barangay Ampianga,Sugbongcogon,Misamis Oriental.
Kini human igo na lang sa nakadawat sa tawag sa telepono si Sugbongcogon Police Station commander Police Capt. Gil Caday gikan kang Ampianga Punong Brgy Agustin Sabuga-a kabahin sa nahitabong kusog nga pagbusikad sulod sa balay sa 10 anyos nga batang babaye sa lugar.
Subay sa inisyal nga pakisusi nga nag-inusara lang ang biktima sa ilang balay sa dihang natigayon ang kalit nga pagbusikad.
Naabtan ni Caday ug Sabuga-a ang biktima nga wala na’y kinabuhi nga nagbuy-od sa salog sa kusina nga bahin sa balay niini ug nagbaton sa grabeng mga samad.
Kini ang rason nga mihimo pa sa post blast examination ang SOCO ug EOD aron sutaon kon unsa nga klase sa eksplosibo ang mibusikad nga maoy miaptay sa biktima.
