CAGAYAN DE ORO CITY – Emosyonal ang usa ka inahan human napalgang patay ang iyang 10 anyos nga anak nga lalaki human gitoohang naligo sa suba sa Sitio Taguanao, Brgy. Indahag, ug na-missing, sukad adlaw’ng Sabado.
Gikompirmar ni Ginang Lorena Simugan ang lawas sa iyang anak nga narekober nga naglutaw sa suba Brgy. Balulang, kaganina sa buntag.
Giila ang biktima nga si John Rodney Simugon, grade 5 student ug nagtungha sa Taguanao Elementary School.
Namahayag si Simugan nga dunay duha ka tag-as nga lalaki kauban ang iyang anak human kini nananghid nga mulakaw.
Wala magdahom ang ginang nga malumos ang iyang anak tungod kay dili man kini hilig maligo sa suba ug dili usab kini kamao mulangoy.
Una niini, gusto sa pamilya Simugan nga ipa-otopsiya ang lawas sa bata human may lama sa dugo sa iyang ilong ug wala mibutod ang iyang tiyan nga maoy timailhan sa mga tawong namatay sa pagkalumos.
