CAGAYAN DE ORO CITY-Kasuhan sa pagdagit, paglugos ug pagpatay ang duha ka treasure hunters nga nasikop sa kapolisan sa Brgy Casisang, Malaybalay City, Bukidnon.
Kini human positibo gitudlo sa testigo ang mga suspek nga si Generso Talirongan ug Jose Ramil Quillobe nga taga Brgy San Jose, Malaybalay City ang ulahing gikauban ni Janice Bahenting sa wala pa nahitabo ang kremin.
Miingon si Malaybalay City Police Station commander Supt Alfredo Ortiz Jr nga unang nagpatala ang ginikanan sa bata kon nganong wala na kauli si Bahenting gikan sa Natibasan Elementary School sa miaging adlaw.
Gilayong gipangita sa kapolisan ang biktima hangtod nakit-an ang patay’ng lawas niini nga wala na’y sapot ug gitaguan sa Sitio Kibaruk sa maong lugar.
Nasikop ang mga suspek subay usab sa narekober nga shortpants ug tsinelas nga nabiyaan sa mismong crime scene.
Una nang nakit-an sa mga otoridad ang school bag sa biktima hinungdan nga gilapdan ang pagpangita sa mga suspek hangtod nga nasapon.
Ipasaka ang patung-patong nga kaso batok mga suspek sa piskalya sa Malaybalay City ugmang adlawa.
