Layu pa sa tinood nga nagbaga nga alegasyon batok kang Vice President Sara Duterte ang kasamtangang dagan sa impeachment trial, mao kini ang panlantaw ni Rauf Sissay sa Bagong Alyansang Makabayan (BAYAN) samtang anaa pa sa Article 4 o kasong grave threats ang gituki sa maong husay.
Hinuon, gipunting ni Sissay nga kining mga hulga sa bise presidente nagpakita og tataw nga propensity for violence nga nahimo nang tatak sa ilang pamilya sukad pa sa panahon sa administrasyon ni kanhi Presidente Rodrigo Duterte.
Dugang pa niini, tataw nga naglikay ug wala nagpakita og igong tulubagon ang kampo sa bise presidente sa matag higayon nga dunay pangutana o pagsaway gikan sa katawhan.
Bisan pa man sa mga isyu, gipahinumdoman sa grupo nga anaa pa lamang sa sinugdanan ang dagan sa impeachment trial busa padayon pa nga gipaabot ang pagtubag sa mga alegasyon.
