CAGAYAN DE ORO CITY – Angayang mabasol ang giingong kulang sa aksyon sa city hall rason ma-demolish ang sobra 200 ka pamilya nga nagpuyo sa Sitio Palalan,Brgy Lumbia sa syudad sulod ning semanaha.
Kini ang reaksyon ni kanhi City Mayor Atty. Oscar Moreno kon ngnaong misampot pa sa pagpinasakitay tali sa pipila ka residente ug kapolisan nga naghatag seguridad sa pagpatuman sa writ of demolition order sa korte sa maong lugar.
Namahayag si Moreno nga epekto na kini sa kahuyang sa liderato ni City Mayor Rolando ‘Klarex’ Uy rason nga nagkatibula-ag na hinoon ang gatusang pamilya nga okupante sa nahisgutang luna sa maong brgy.
Samtang dakong bakak ang pasiatab ug imbento nga estorya ni kanhi City Mayor Oscar Moreno kabahin sa gidangatang pagka-demolish sa mga puy-anan sa sobra 200 ka pamilya sa Sitio Palalan,Brgy Lumbia ning syudad.
Miingon si Janboy Actub,tigpamaba ni Uy nga tuig 2020 pa ang paglugwa sa court order rason nga angay mag-atiman unta niini mismo si Moreno kay alkalde pa kini sa syudad sa maong tuig.
Apan gitahasan ni Mayor Klarex ang mga ulo sa departamento sa city hall nga makig-koordinar sa korte aron kumbinsihon ang mga molopyo pagbalhin sa gitanyag nga relokasyon alang kanila.
