CAGAYAN DE ORO CITY – Nagka-daghan ang mga dinakpan nga nakahimo’g pagsupak sa gipatuman nga gun ban sa Northern Mindanao alang sa May 12 elections.
Namahayag si Police Regional Office 10 spokesperson Major Joann Navarro nga sukad napatuman ang gun ban,anaa sa 62 ka supakero sa maong balaod ang nasignit nga gilakipan sa 20 pinasikad sa mando sa Commission on Elections.
Siya miingon nga ang laing 42 ang nadakpan pinasubay sa normal police operations gikan sa nagkadaiyang lower units sa rehiyon.
Gawas sa mga dinakpan,anaa na sa 53 ka armas nag nakompiskar ug laing 601 ka bala ang naapil sa pagka-embargo sa mga otoridad.
Nag-unang tuyo sa gipatuman nga gun ban ang paglimitar sa mga tawo nga makagamit sa mga armas nga hayan kasangkapan sa pagsabwag kagubot sa mismong kampanya sa mga kandidato-lokal ug sa aktuwal nga pagbotar sa katawhan sa petsa 12 sa Mayo ning tuiga.
Hisayrang nanultihan ang PRO 10 nga sa 62 ka dinakpan, duha niini pulis ingon man tag-usa ka sundalo ug taga-Bureau of Customs ang apil sa nangakasuhan.
