CAGAYAN DE ORO CITY-Nasikop sa hiniusang pwersa sa Criminal Investigation and Detection Group o CIDG-CdeO Team;RPSB-10 ug Manolo Fortich Police Station ang ang duha ka magsoong gitumbok nga sakop sa notorious gun for hire criminal gang sa Bukidnon.
Sa pakighinabi sa Bombo Radyo kang CIDG deputy chief operations Supt Melgar Devaras, iyang giila ang ilang prime target nga si Rodolfo Bongcaron kinsa gitudlong hired killer nga mipatay sa duha ka mayor ug kagawad sa Bukidnon ug Misamis Occidental sa miaging katuigan.
Nasikop usab ang iyang igsoon niini nga si Alfredo Bongcaron nga diin nakuhaa’g mga armas. Ipasaka ang kaso ang duha ka dinakpan sa sunod semana.
Namugos usab si Devaras nga lehitimo ang pagsikop sa gitumbok nga sakop sa criminal gang didto sa Bukidnon.
Gitin-aw ni Devaras nga nagdala sila’g duha ka search warrant gikan sa Gingoog City RTC ug ila kining gisilbi sa managlahing pinuy-anan sa magsoong Bongcaron nga pulos residente sa Brgy Ala-e, Manolo Fortich,Bukidnon.
Nakuhaan sila’g kalibre 45, .22 revolver, daghang bala, mga silencer, duha ka improvised nga pusil ug bullet proof vest.
Hisayran nga si Rodolfo dugay nang may kaso sa pagpatay ug carnapping diin naka-eskapo sa Misamis Oriental Provincial Jail sa tuig 1993.
