Hugtanon ang pagmonitor sa Department of Agriculture Region 10 sa mga munisipyo sa Bukidnon nga posibleng maapektuhan sa El Niño karong bulan sa Hulyo.
Gipahayag ni DA-10 Director. Jose Apollo Pacamalan, nga pinaagi sa granular data gikan sa PAGASA, ilang gi-apod-apod ang impormasyon sa matag lungsod aron masayran kon asa dapit ang posibleng makasinati og grabeng kainit.
Samtang gipakita sa color coding nga daghang lugar sa maong probinsya ang anaa pa sa normal nga kahimtang, giawhag sa opisyal ang mga mag-uuma nga daling ipaspas ang pagtanom karong Hunyo ug Hulyo.
Dugang pa sa direktor, ang ilang estratehiya karon mao ang pag-ila sa mga lugar nga adunay strategic nga food production value aron kini ang hatagan og prayoridad nga maprotektahan.
Bisan tuod giingong dunay mga dapit nga moabot sa 80% ngadto sa 90% nga pagkunhod sa ulan sa hinapos sa Hulyo paingon sa Agosto, positibo ang buhatan nga mabawi ra kini pag-abot sa bulan sa Septiyembre.
