CAGAYAN DE ORO CITY – Gibubuan sa Police Regional Office 10 sa halos 2-mil ka pulis ang sobra 200 ka menteryo aron masiguro nga makab-ot ang luwas nga pag-obserbar sa Ligtas UNDAS 2024 sa Northern Mindanao.
Miingon si PRO 10 Director Brig Gen Jaysen De Guzman nga sa maong ihap,mil-700 ang gipakaylap palibot sa rehiyon samtang dugang 270 ka personahe sa Kampo Alagar ang gitahasan usab nga modalikyat sa mga menteryo aron isiguro nga nasunod ang seguridad nga gusto ipatuman sa Kampo Krame.
Gibutyag ni De Guzman nga gusto nila nga mabati sa publiko nga luwas sila dili lang sa mga pagduaw sa menteryo apan bisan sa mga lugar diin sila naggikan alang sa maong katuyuan.
Hisayrang anaa sa halos 4-mil ka security personnel ang giandam nga giapilan sa kasundaluhan,Philippine Coast Guard, Maritime Police, Airport Police ug force multipliers aron makab-ot ang linaw ug hapsay nga pagsaulog sa adlaw sa mga santos ug mga kalag ning semanaha.
