CAGAYAN DE ORO CITY – Wala pa’y gilugwa nga resulta sa imbestigasyon ang Bureau of Fire Protection Cagayan de Oro District sa pagkasunog sa 32 ka balay nga gilamoy sa kalayo sa Mulmac,Brgy Macabalan ning syudad kagabii.
Kini taliwala sa teorya nga nagsumikad ang kalayo sa balay ni Bobong Macajelos diin giingong adunay pagluto sa panihapon rason sa pagkaylap sa kalayo.
Matud ni BFP -CdeO District Operations chief Senior Fire Inspector Bryan Kyle Lauzon nga padayon ang pakisusi nga gihimo sa ilang mga ginsakupan sa pinakarason sa pag-ulbo sa sunog.
Giangkon ni Lauzon nga naglisod sila sa pagsulod sa pinaka-uyukan sa sunog taliwala nga duol sa BFP-Macabalan Station ang lokasyon kay sudlon ang tinubdan sa kalayo.
Hinoon,walay kinabuhi sa mga residente nga nakalas o naangol gawas lang sa pipila ka mga binuhing mananap nga namatay sa hitabo.
Mitala sa 200-mil pesos ang damyos sa istraktura nga nasunog ug wala pa’y labot niini ang personal nga kabtangan sa mga tagbalay.
Hisayrang anaa sa halos 50 ka pamilya ang apektado sa makaupat nang higayon nga pagkasunog sa maong bahin sa Macabalan ning syudad.
