CAGAYAN DE ORO CITY – Wala wad-a sa Bureau of Fire Protection ang anggulo nga depektoso nga koneksyon sa koryente ang tipik sa mga rason pag-ulbo sa sunog sa Zone 4,Brgy Lapasan ning syudad.
Kini human anaa sa halos 70 ka pamilya nga okupante sa 42 ka balay ang gilamoy sa kalayo diin 38 ang dili na mapuslan sa mga tag-iya niini.
Namahayag si BFP-Cagayan de Oro District spokesperson Senior Fire Officer 3 Imelda Barazan nga nagsumikad ang pag-ulbo sa kalayo sa pipila ka puy-anan nga luyo lamang sa usa ka lodging house sa lugar.
Hinoon,walay natala nga bisan usa ka residente nga samaron o namatay atol sa dakong sunog.
Mitala usab sa 6 milyones pesos ang initial structural damage sa hitabo.
Samtang miihangyo sa dugang tabang si Punong Brgy Julito Ogsimer ngadto sa nagkadaiyang grupo alang sa iyang katawhan nga naigo sa dakong sunog sa Zone 4, Brgy Lapasan sa miaging Mayo 31 sa kagabii.
Kini tungod kay dili igo ang ilang mahatag nga tabang sanglit limitado ra usab ang pondo nga malugwa sa panudlanan sa brgy alang niini.
Namahayag si Ogsimer nga unta dunggon ang hangyo sa ilang apektadong mga residente kay dili usab sayon kon mabiktima sa trahedya sama sa sunog.
Hisayrang tipik sa mga pamilyang apektado ang midangop sa ilang mga kabanay samtang ang uban anaa sa covered court nga naghulat pa sa dugang mga ayuda aron sila makabangon gikan sa hitabo.
