CAGAYAN DE ORO CITY – Gitugyan na sa hingpit sa provincial government sa nagkadaiyang departamento sa kapitolyo ang halos P119 milyon nga kantidad sa mga sakyanan aron magamit sa pagsilbi pa sa katawhan sa Misamis Oriental.
Kini human miluntad usab sa tulo ka tuig ang paghulat ayha hingpit naaprobahan sa Bureau of Local Government Finance ang maong hangyo sa pagbaton sa dugang mga sakyanan alang sa matag-departamento sa kapitolyo probinsyal.
Miingon si Misamis Oriental Provincial Governor Bambi Emano nga nagsugod ang ilang hangyo tuig 2018 ug nahimua’g sunod-sunod nga follow up Marso 2020 na ug nalugwaan sa sertipikasyon sa BLGF sa miaging Abril sa susamang tuig.
Namahayag si Emano nga sa pagbaton sa 41 ka pickup ug 23 ka van units sa kapitolyo,unta mapasayon pa ang pagtunol serbisyo sa katawhan sa lalawigan.
Kini nga tinguha sa gobernador ang naumol sa dihang naabtan niini ang kapitolyo nga kulang kaayo’g mobilisasyon rason nga gigahinan sa igong pondo gikan sa ilang bank loan nga gamiton sa nabiling mga proyekto nga iyang tiwason ayha motibawas sa pagka-gobernador sa tuig 2022.
Gihagit usab ang mga ulo sa departamento nga ampingan ang dugang mga salakyan sa kapitolyo aron bisan kon matapos na ang iyang termino ang mapuslan pa kini sa katawhan sa probinsya.
Gihimo ang pagturnover sa mga salakyan sa mismong tugkaran sa kapitolyo samtang gitamod ang piyesta-opisyal nga adlaw o holiday alayon sa kasaulugan usab sa Eid al-Fitr sa Muslim communities sa nasud ning petsaha.
