BAD NEWS! Lauman ang laing hugna sa oil price hike sa dili pa matapos ang bulan sa Abril.
Namahayag ang Department of Energy nga sa Abril 29 adunay halos dos pesos nga pagsaka sa presyo matag litro sa Gasolina, Diesel ug Kerosene.
Resulta gihapon kini sa padayong tensyon sa Amerika batok sa mga oil shipping network sa Iran, gawas pa sa gisudlang trade-tariff war ni US President Donald Trump.
Miingon si Assistant Director III Rodela Romero sa Oil Industry Management Bureau nga sa adlaw’ng Martes lauman ang 80 sentabos hangtud P1.40 nga usbaw kada litro sa Gasolina.
Laing 40 sentabos hangtud piso ang umento sa kada litro sa Diesel, ug 50 sentabos kutob 70 sentabos ang increase sa kada litro sa Kerosen.
Una niini, ang pagsaka sa presyo sa lana, nagsumikad sa lakang sa US Treasury nga ipahamtang ang silot kang Seyed Asadoollah Emamjomeh, usa ka Iranian LPG magnate, ug sa iyang corporate network.
Namugos si US Treasury Secretary Scott Bessent nga responsable ang grupo ni Emamjomeh sa pag-export sa minilyong dolyar nga kantidad sa Iranian LPG ug krudo ngadto sa mga langyaw nga merkado aron malikayan ang naglungtad nga US sanctions.
Gawas pa niini, nakaapekto usab sa presyo sa lana sa pagkunhod sa oil inventory sa US nga nagpakita sa mas taas nga panginahanglan.
