CAGAYAN DE ORO CITY – Gipangita sa kapitolyo-probinsyal ang giingong walo ka dump trucks nga nagkostar sa halos 24 milyones pesos nga gipalit sa kanhi pamunuan ni former Governor Peter Unabia.
Kini ang gibulgar ni Misamis Oriental Governor Juliette Uy atubangan sa mga empleyado sa kapitolyo dihang gipakayab ang nasudnong bandila kaganihang buntag.
Miingon ang gobernadora nga nakurat kini nga nanawag kaniya ang usa ka negosyante kay gustong maningil sa bayad sa walo ka dump trucks nga gi-order sa kanhi administrasyon.
Misugilon daw ang negosyante nga Abril ning tuiga pa niya nahatod ang maong mga trak nga nagkotar ang matag-usa sa 3 milyones pesos.
Kini ang rason nga gipapangita niya ang maong mga sakyanan aron sutaon kung tinood ang gisulti ngadto kaniya sa negosyante.
Sa pagkutlo ning balita, wala pa’y tubag si Unabia batok sa mga atake ni Uy diin bukas ang mga mikropono sa Bombo Radyo alang sa iyang katin-awan kabahin sa maong isyu.
