CAGAYAN DE ORO CITY – Nadakpan sa mga ahente sa team 1 sa Regional Police Drug Enforcement Unit 10 ang 34 anyos nga gitratar nila nga regional top priority target nga naglihok sa Brgy Canitoan ning syudad.
Kini human gikasa ang anti-illegal drug operations batok sa dinakpan nga si alyas Celyn kinsa kapikas sa dinakpan nga notoryus gihapon nga tigpakaylap sa illegal droga ug kasamtangang detinado sa pasilidad sa Brgy Lumbia ning dakbayan.
Sumala ni Police Regioanl Office 10 spokesperson Major Joann Navarro nga nakuha sa mga operatiba gikan kang Celyn ang 550 gramos sa gitoohang shabu nga mikostar sa 3.7 milyones pesos ug
ubang mga ebedensiya.
Subay sa impormasyon sa RPDEU 10 nga human mahuptan sa suspek ang droga, gilayong modalikyat ang iyang mga sakop alang sa repacking ayha ipangbaligya sa ilang lugar ug bisan sa trabahuan niini diin nagsilbi kining kahera sa food stall sa merkado-Agora ning syudad.
Sa pikas bahin, nakasignit ang mga operatiba sa Opol Municipal Police Station sa duha ka suspected nga tigpakaylap sa shabu sa Misamis Oriental.
Gipatumbok ang mga dinakpan nga sila CM,21 anyos ug Ryan, 33 anyos,pulos mga ulitawo ug nagpuyo sa susamang lungsod.
Nakuha gikan sa mga dinakpan ang 129-mil pesos nga balor sa gitoohang shabu nga mitimbang sa 19 gramos.
Managsama nga handusan sa kasong pagsupak sa Comprehensive Dangerous Drugs Act of 2002 sa magkalahing piskalya nga pulos nakabase sa dakbayan.
