CAGAYAN DE ORO CITY – Imported illegal drugs na ang sagad gasulod sa Pilipinas nga tipik ang Northern Mindanao nga sudlan sa mga sindikato sa ilegal nga droga.
Kini ang tubag ni PDEA 10 regional director Benjamin Gaspi sa pangutana kon nganong aduna gihapo’y ilegal nga droga nga mismo sila ang nag-kompirmar nga wala na’y mga shabu laboratories nga naglihok dinhi sa nasud.
Miingon si Gaspi nga sagad sa mga ilegal droga ang gikan na sa ubang kanasuran nga i-agi sa kadagatan ayha ibiyahe sa mga lugar diin anaa ang mga sakop sa sindikato aron mabaligya sa mga gumagamit niini.
Gihimo ni Gaspi ang pahayag nunot sa ilang pagsunog sa halos 5 milyones pesos nga balor sa ilegal nga droga sa cremation facility diha sa Capistrano Street ning syudad kagahapong adlawa.
Samtang target sa Police Regional Office 10 nga magbaton sa igong teknolohiya aron ma-live streaming sa ilang mga operatiba ang paglusad sa anti-illegal drugs operations ilabina hurisdiskyon sa Northern Mindanao region.
Kini ang pagpasabot ni PRO 10 Operations chief Col. Wilbur Salaguste nunot sa subli pagpadumdom ni Regional State Prosecutor Merlynn Barola-Uy nga kanunay pagsul-ob sa body worn cameras ang mga pulis nga gitahasan sa paglusad sa mga operasyon batok ilegal nga droga.
Miingon si Salaguste nga walay hunong ang paninguha sa Camp Crame nga makabaton sa igong pondo aron ma-monitor nila ang ilang mga sakop gamit ang mga camera nga gimando sa balaod sa matag-operasyon.
