CAGAYAN DE ORO CITY – Nakakompiskar ang lower units sa Police Regional Office 10 sa halos 6 milyones pesos nga kantidad sa gidiling droga epekto sa 54 ka operasyon diin 63 ang nadakpan palibot sa Northern Mindanao region.
Matud ni Police Regional Office 10 spokesperson Major Joann Navarro nga ang sunod-sunod nga anti-illegal criminality campaign sa lower units ang nakadakop sa 128 ka personalidad nga gisugdan sa hinapos nga semana sa Hunyo hangtod petsa 3 sa Hulyo ning tuiga.
Siya miingon nga partikular sa anti-illegal drugs operations, anaa sa 863.387 gramos sa gitoohang shabu ang nabawi.
Nakadakop usab ang ilang tropa sa unom ka personalidad nga nalambigit sa illegal nga pasugal diin halos libo ka pesos nga kagamitan ang nakompiskar.
Napaslak sa nagkadaiyang selda usab ang 49 ka indibidwal diin 7 kanila ang nagsilbing nagbaton sa mga bug-at nga kasong kriminal.
Sa walay hunong nga anti-smuggling operation,anaa sa 564-mil 880 pesos nga kantidad sa smuggled cigarettes ang nakompiskar usab sa lower units palibot sa rehiyon.
Dugtong niini,gipahalipayan niya ang impresibong resulta sa operasyon sa ilang tropa batok sa nagkadaiyang porma sa kremin.
Gipasalig usab niini nga kanunay ang paghatag suporta sa PRO 10 sa ilang mga pulis nga anaa sa kakugi pagsanong sa mga kamanduan gikan sa PNP national headquarters.
