CAGAYAN DE ORO CITY – Nakabawi ang lower units sa Police Regional Office 10 sa halos 7 milyones pesos nga gitoohang shabu ingon man marijuana sa gipalig-on nga kampanya kontra illegal nga droga ug ubang criminal activities sa Northern Mindanao sa hinapos nga semana sa Mayo ning tuiga.
Namahayag si Police Major Joann Navarro, tigpamaba sa PRO 10 nga anaa sa 220 ka tawo ang nasignit sa halos 80 ka operasyon diin 96 kanila ang nalambigit sa pagpakaylap sa iligal nga droga sama sa shabu ug marijuana.
Siya miingon nga nadakpan usab sa lower units ang 15 ka personalidad gumikan sa kalambigitan sa illegal nga pasugal diin na-embargo ang kapin 6-mil peoss nga kantidad sa kagamitan.
Nahipos usab sa anti-criminality operations ang 103 ka wanted persons diin 23 niini ang pinaka-pinangita sa balaod gumikan sa dagko nila nga atraso sa balaod.
Nakakuha usab ang mga otoridad sa kantidad 311-mil 330 pesos nga inismagol nga sigarilyo gikan sa nagkadaiyang operasyon sa rehiyon.
Nasignit usab ang balor 145-mil pesos nga kagamitan sa illegal mining operasyon nga nagsumikad sa pipila ka bahin sa hinterland barangays sa rehiyon.
Dugtong niini,namahayag si PRO 10 Director Brig Gen Jaysen De Guzman nga dalaygon ang kakugi sa ilang lower units nga taliwala sa kakulangon apan nahatag gihapon nila ang kagustuhan sa katawhan nga masanta ang nagkadaiyang porma sa kriminalidad sa komunidad.
