CAGAYAN DE ORO CITY – Nag-atubang sa kasong pagsupak sa pagbaligya sa ilegal nga droga nga nalatid sa akta republika 9165 (Dangerous Drugs Act of 2002) ang tulo ka dinakpang suspected drug pushers sa Purok ,Brgy Manila Group,Wao,Lanao del Sur.
Giila ang mga dinakpan nga sila Mustapha Dipatuan Solaiman alyas Ex;Mamak Baraza Solaiman ug Nursudin Bilao Bantak alyas Odin nga pulos nagpuyo sa Marawi City.
Namahayag si Philippine Drug Enforcement Agency-Bangsamoro Autonomous Region spokesperson agent ‘Jomari’ nga nakuha gikan sa mga dinakpan ang balor halos 7 milyones pesos nga gitoohang shabu atol sa operasyon kuyog ang kapolisan ug militar sa lugar.
Gawas sa nabawi nga gitoohang shabu,nakompiskar usab sa maong hiniusang operasyon ang ubang ebedensiya nga magamit sa pagpalig-on sa kaso batok sa mga dinakpan.
Sa miaging unang semana sa Abril ning tuiga,may nadakpan gihapon ang government state forces pinanguluhan sa PDEA-BAR nga high value target diin nabawi ang 34-milyones pesos nga gitoohang shabu nga nagtimbang lima ka kilo sa Malabang,Lanao Sur.
