CAGAYAN DE ORO CITY – Detinado sa PDEA-10 mini-cell ang duha ka high value targets nga nadakpan sa hiniusang operasyon sa NBI-10 ug PDEA-10 ingon man sa PNP sa Kalanganan East, Pantar,Lanao del Norte kagahapong adlawa.
Kini human gilusad ang entrapment operation nga nag-resulta pagkasikop nila ni Macmac Comadug,40 anyos nga taga-Marawi City ug Hasmine Sa-id,21 anyos nga residente sa Sultan Naga Dimaporo sa maong probisnya.
Gibutyag ni PDEA agent JunDabs nga nakompiskar sa posisyon sa duruha ang dul-an usa ka kilo nga gitoohang shabu nga nagbalor sa halos 7 milyon pesos.
Miingon si JunDabs nga dako’g posibilidad nga naggikan sa lungsod sa Maguing,Lanao del Sur ang shabu nga nakuha nila gikan sa suspek.
Samtang gihagit sa suspected drug pusher nga si Comadug ang PDEA ug NBI nga ayuhon ang pag-verify sa ilang impormasyon kabahin sa pasangil nga siya nalambigit sa pagpayuhot sa ilegal nga droga.
Kini human namugos si Comadug nga wala siya masayod nga kargaha’g ilegal nga droga ang iyang sakyanan hinungdang naapil sa pagkasikop.
Miingon ang suspek nga wala siya’y kasayuran sa transaksyon kay igo ra siya gitawagan nga dunay mosakay sa sakyanan niini padulong dinhi sa rehiyon.
