CAGAYAN DE ORO CITY- Gibasura sa korte ang hangyo sa mga abogado nga temporaryo ipagawas ang magsoong City Vice Mayor Nova Princess ug Reynaldo Parojinog Jr sa custodial center sa PNP-Camp Crame.
Kini aron giingong makatambong sa paglubong sa ilang ginikanan nga si City Mayor Reynaldo Sr ug Susan Parojinog sa Ozamiz City sa adlaw’ng Lunes.
Namahayag si RTC Branch 15 Executive Judge Edmundo Pintac nga nagdala’g peligro sa seguridad ang pagpagawas sa magsoon hinungdan nga gibasura niini ang ilang petisyon.
Nasuta nga ang magsoong Nova ug Reynaldo Jr ang nag-atubang sa tulo ka bug-at nga kaso human masikop sa anti-illegal drug operation sa kapolisan sa Ozamiz sa miaging semana.
Hisayrang gipaboran ni Pintac ang rason sa government prosecutors ug PNP nga mga peligroso nga binilanggo ang magsoong Parojinog hinungdan nga dili sila angay hataga’g higayon makauli sa Ozamiz City.
