CAGAYAN DE ORO CITY – Nangayo’g pasaylo si City Mayor Oscar Moreno sa health authorities dihang gibalibaran niini ang hangyo nga ipaubos sa lockdown tungod sa nagkataas nga bahad sa coronavirus disease sa syuadd.
Siya miingon nga dako ang iyang pagpasalamat sa sakripisyo nga nahimo sa mga doktor, nurses ngadto na sa mga pasyente sa COVID-19 apan pabiling gibarugan niini nga dili niya mahatag ang ilang gipangayo.
Dugang niini nga nakasabot siya nga mibati na’g kahadlok ang mga doktor dihang ubay-ubay na nga susama nila’g propesyon ang namatay gumikan sa virus.
Dugtong niini, giawhag ni Moreno ang mga nagsugyot sa lockdown nga unahon pag-lockdown ang ilang kaugalingon aron sundon sila sa uban.
Samtang giawhag ni Moreno ang mga residente sa siyudad nga dili hagiton ang kapolisan nga magbantay sa ipatuman nga curfew sa syudad.
Kini dihang gihimo na nga alas-9:00 sa gabii padulong alas-5:00 sa buntag ang curfew sa dakbayan.
Si Moreno miingon nga magpaggawas usab siya’g ordinansa nga magdili sa mga tawo nga mag-inom gawas sa panimalay isip precautionary measure batok COVID-19.
Siya miingon nga kinahanglang sundon sa katawhan ang balaod sa syudad aron dili sila madakpan ug masilotan.
