CAGAYAN DE ORO CITY – Iduso ni Misamis Oriental Representative Julliete Uy sa Department of Justice o DOJ ang Hold Departure Order kon HDO batok sa executive officers sa Verde Soko Philippines Industrial Incorporated nga responsable sa pagpalusot sa 5-mil 100 metriko tonelada nga basura sa Mindanao Container Port o MCT sa Tagoloan Misamis Oriental niadtong Hulyo 21, 2018. Namugos ang kongresista nga kinahanglan madakpan sa hinanaling panahon sila Chul Soo Cho alias Charles Cho, Jae Ryang Cho ug Sena Na, aron mataral sa hukmanan, ayha madeport sa South Korea. Kini ang rason nga iyang gihangyo si Prosecutor-General Benedicto Malcontento nga seryosong tutukan ang kontrobersiya nga gikalambigitan sa mga nagtugo-tagu nga opisyal sa korean company.
Samtang welcome development alang kang MCT port collector John Simon ang pagsang-at ni Misamis Oriental Representative Juliette Uy sa sugyot nga hold departure order o HDO batok sa kadagkuan sa Verde Soko Philippines Industrial Incorporated.Namahayag si Simon nga silang duha ni Uy ang naningkamot nga madakpan ang mga responsable sa labing dako nga kontrobersiya sa mga basura nga nakasulod sa Pilipinas. Gusto ni Simon nga madakpan na gipangita nga Korean officials sa Verde Soko
Dumduman nga mag-usa na ka tuig nga natanggong ang mga toxic waste nga iya sa Verde Soko Philippines sa Tagoloan Misamis Oriental. Namahayag si Simon nga daghang mga residente ang apektado sa baho ug makahilo nga plastic waste nga gitambak sa Sitio Bugwak, Brgy Sta Cruz, Tagoloan. Gitumbok sa opisyal ang pagka-iresponsable sa Verde Soko tungod kay gidaut niini ang kinaiyahan tungod sa mga basura nga ilang gitago sa maong lugar. Sa pagkakaron, nagpadayon ang pagsulod sa sako sa mga basura o repacking ayha isulod sa 250 ka ihap sa mga containers.
