Nagpadayag og dakong kabalaka si Albert Pascual, ang Secretary-General sa Health Alliance for Democracy, mahitungod sa padayon nga paghatag og donasyon ni Health Secretary Ted Herbosa ngadto sa mga langyaw nga organisasyon sama sa World Health Organization ug UNICEF.
Gikuwestiyon ni Pascual ang rason sa maong desisyon ilabi na nga nag-atubang karon og grabeng krisis ang sistema sa panglawas sa atong nasod.
Sumala pa sa maong opisyal, daghan na ang mga pasyente ang nangamatay tungod kay dili na kini maabot sa mga ospital o kaha dili na madawat tungod sa kakulang sa kapasidad.
Dugang pa niini, gipunting usab niya ang kahimtang sa mga healthcare workers nga napugos na sa pag-duty og 24 hangtod 36 ka oras tungod sa kakuwang sa manpower.
Imbes nga sulbaron ang maong mga problema, giingon ni Pascual nga nagdugang lang sa palas-anon ang mga programa sa kasamtangang administrasyon sa Department of Health.
