CAGAYAN DE ORO CITY – Wala lang mo-sentro sa kalambuan ug kalampusan ang unod sa tulo ka oras nga city mayor’s annual report (CMAR) ni Mayor Rolando ‘Klarex’ Uy apan gituki niini ang pipila sa kapalpakan sa liderato ni kanhi City Mayor Oscar Moreno.
Kini human unang namulong si Moreno nga paminawon niya ang pakigpulong ni Uy nunot sa kasamtangan nga kahimtang ug sunod nga direksyon sa dakbayan.
Partikular nga gitumbok sa mayor ang gibiling nga dakong kakulangon ni Moreno sa pag-atiman sa programang panglawas sa city hospital ug sa duha ka infirmaries nga nahimutang sa Brgy Lumbia ug Brgy Tablon ning syudad.
Siya miingon nga nahurot na lang ni Moreno ang siyam ka tuig sa termino niini apan pabiling level 1 ang status sa ospital sa syudad.
Una niini,namahayag si Moreno nga dili lang kabahin kon pila ang nakasal ug nahatagan sa mga litson ni Klarex ang iyang gusto madunggan apan ang ubang mga programa nga mi-sentro sa katawhan.
Samtang dii usab luwas sa tulubagon si Moreno pag-abot sa programang pabahay alang sa ihap sa mga pamilyang kabus nga nagsilbing mga benepesaryo unta niini dinhi sa dakbayan.
Kini human wala palabya ni Uy sa iyang three-hours city mayor’s annual report ang nadiskobre nga giingong mga kahiwian sa pagpamalit sa yuta ug katukuran sa housing units.
Miingon si Uy nga daghang kuwestiyonable sa housing program ni Moreno nga gitul-id sa kasamtangang administrasyon.
Dumduman nga gi-special report kaniadto sa konseho nga adunay housing units pa nga wala matrabaho samtang ang uban wala puy-i hinungdan nga nangaguba na lang kini sa relocation sites sa syudad.
