CAGAYAN DE ORO CITY – Dili pa i-ubos sa city health office ang taas nga alerto alang sa seguridad sa panglawas sa mga residente sa Dabatian Street,Brgy Carmen sa syudad.
Kini bisan nga negatibo sa coronavirus disease clustering o dugang pagtinakdanay ang mga residente sa maong lugar.
Miingon si City Epidemiologist Dr Joselito Retuya nga nakatutok pa gihapon ang contact tracing team bisan nga nadala na sa city isolation unit ang pamilya sa 34 anyos nga babaye nga namatay tungod sa bayrus.
Una nang naka-lockdown ang Dabatian Street aron pugngan ang dugang kaso sa bayrus sa Brgy Carmen sa syudad.
Samtang gidala sa City Isolation Unit ang 25-anyos nga Covid-19 patient gikan sa Northern Mindanao Medical Center NMMC.
Gibutyag ni City Epidemiologist Dr Joselito Retuya nga pabilin nga nagpositibo sa virus ang pasyente nga taga Brgy Lumbia ning syudad atol sa iyang ikaduha nga laboratory examination.
Apan gitin-aw niini nga adunay kalambuan sa estado sa panglawas sa pasyente ug wala na makasinati sa mga sintomas sa bayrus hinungdan nga ilang ibalhin sa Department of Health-accredited temporary treatment aron mamonitor sa health workers.
Una nang gikompirmar ni Retuya nga nag-negatibo sa swab test ang bana ug anak sa 69 anyos nga covid-19 positive nga namatay ug molopyo sa Macanhan,Brgy Carmen ning syudad.
