CAGAYAN DE ORO CITY – Giduaw ni Pres Rodrigo Duterte ang haya ni late Police Senior Master Sgt Jason Magno sa iyang pinuy-anan diha sa Initao,Misamis Oriental kagabii.
Kini human gipaabot ni Duterte ang iyang personal nga pagpasubo sa pamilya gumikan sa gidangatan ni Magno nga mi-sakripisyo sa kinabuhi maluwas lamang ang mga sibilyan gikan sa mibusikad nga granada gikan kang MNLF member Ibrahim Basher.
Miingon si Initao Police Station commander Capt Arlyn Ranario nga hinoon wala kini makaduol pag-ayo kang Duterte nga nakig-estorya sa pamilya ni Magno gumikan sa laing tahas nga gihatag kaniya ni Misamis Oriental Provincial Police Office Dir Col Robert Roy Bahian kagabii.
Ilubong si Magno nga hatagan sa 21 gun salute sa usa sa mga sam-ang sa maong lungsod ugmang adlawa.
Samtang ilhon usab sa senado ang pagkabayani pinaagi sa pagbuhis kinabuhi ni Magno dili lamang mabuthan sa granada ang daghang sibilyan.
Kini human gipasar ni Sen Sonny Angara ang resolusyon diin nagtinguha paghatag pagyukbo sa sakripisyo ni Magno nga gihimong panangga ang iyang lawas sa pagbusikad sa granada nga gidala sa suspek taga-Madamba,Lanao del Sur.
Namahayag si Angara nga ang klase sa pulis sama kang Magno ang tinud-anay nga nagrepresentar sa maayong imahen sa PNP sa nasud.
Una niini,gihatagan usab ni PNP officer-in-charge Lt Gen Archie Gamboa sa pasidungog ingon man sa cash assistance dihang personal kining mibisita sa haya ni Magno sa Initao niadtong adlaw’ng Domingo.
