CAGAYAN DE ORO CITY – Ihatod na sa katapusang pahulayan ang bayani nga pulis nga si late Police Senior Master Sgt Jason Magno sa San Pedro Private Cemetery sa Initao,Misamis Oriental karong buntag.
Miingon si Misamis Oriental Provincial Police Office Director Col Robert Roy Bahian nga unang dad-on ang patay’ng lawas ni Magno sa municipal hall alang sa necrological service ug gilayong sundan sa santos nga misa sa Saint Francis Xavier Church.
Halaran usab kini sa labing taas nga pagsaludo sa kapolisan tungod sa iyang pagsalbar sa daghang kinabuhi sa sibilyan sa Initao College ayha hingpit ilubong ning adlawa.
Si Magno ang nabisita ni Pres Rodrigo Duterte ug PNP officer-in-charge Lt Gen Archie Gamboa diin pulos gihatagan sa pasidungog sa bayanihon niyang binuhatan.
Samtang gimando ni Police Regional Office-10 Director Brig Gen Rolando Anduyan ang pagtinarong sa trabaho sa tanang mga pulis dinhi sa rehiyon.
Kini tungod sa dili tiaw nga paghatag suporta ni Duterte sa kapolisan magtarong lamang sa ilang pagserbisyo sa katawhan.
Gihimo ni Anduyan ang pahimangno human personal mibisita si Duterte sa haya ni Magno sa Initao ning lalawigan sa miaging gabii.
Miingon sa heneral ang komento human sila matandog sa kakugi sa presidente masiguro lamang niini nga mapaabot ang pagpangga ngadto sa mga pulis sa nausd.
