CAGAYAN DE ORO CITY – Walay kuwestiyon sa kompanyang Hexaprime ang pagbaton sa Diamond Millenium Corporation o DMC sa status quo ante order gikan sa Korte Suprema.
Apan gipasabot sa Hexaprime chief legal counsel nga si Atty. Del Bert John Barsaga nga wala kini nagpasabot nga balik-operasyon na ang DMC kay wala na kanila ang authority to operate.
Siya miingon nga bisan anaa sa DMC ang pagdapig sa korte suprema apan wala usab kanila ang pagtugot sa PCSO ug hinoon anaa sa Hexaprime aron ilhon nga lehitimo nga operator sa mga padula sa STL sa syudad ug lalawigan.
Gani, aron mas maklaro pa, milugwa’g sertipikasyon ang PCSO sa tuyo nga ipalig-on ang paghupot sa Hexaprime sa authority to operate sa mga padula sa STL sa syudad-lalawigan.
Siya miingon nga bisan kon dunay mando ang korte suprema apan ang mga regulasyon sa PCSO ang pabiling masunod pag-abot sa maong isyu.
Una nang nag-operate ang Hexaprime ubos sa pagtugot sa PCSO sa syudad ug lalawigan sugod Oktobre 17, 2023 hangtod sa kasamtangan.
Subay sa nahuptan nga sertipikasyon,gitugtan ang DMC maka-operate sa STL games gikan Abril 15,2022 hangtod petsa 14 sa Abril 2025 pero giwad-ag bili pag-abot sa Hulyo 12, 2023 apan gilugwaan usab sa korte suprema sa status quo ante order ang gihimo sa PCSO.
Samtang gi-depensa sa kompanyang Hexaprime ang sunod-sunod nga pagpangdakop sa mga pulis batok sa outlets sa STL nga iya sa DMC.
Kini human unang misulti si DMC chief legal counsel Atty. Dale Bryan Mordeno nga kasuhan nila ang mga pulis nga maoy nangdakop sa halos 20 ka STL tellers nga nag-operate sa dakbayan ug probinsya.
Namahayag si Barsaga nga kabahin sa ilang obligasyon ayha nahatagan sa authority to operate sa mga padula ang sa STL ang paghatag impormasyon sa Philippine Charity Sweepstakes Office o PCSO batok sa mga ilegal nga susamang padula.
Kini ang hinungdan nga nadakpan ug gipangkasuhan sa anti-illegal gambling law sa kapolisan ang mga dinakpan sa nagkadaiyang piskalya sa CdeO-Misamis Oriental area of operations.
Miingon si Barsaga nga kon dili nila buhaton ang pag-alkontra sa mga ilegal nga padula,bawion usab sa PCSO ang nahatag ngadto kanila nga pagtugot sa STL operations.
