CAGAYAN DE ORO CITY – Nagmalinawon ang Higalaay Civic Military ug Float Parade sa bespiras sa kapistahan ni Sr San Agustin ning syudad.
Kini bisan nga nag-atubang sa ‘security dilemma’ ang Cagayan de Oro City Police Office o COCPO.
Moabot sa 112 ka organisasyon, tunghaan ug establishimento diin kabahin ang Bombo Radyo ug Philippine Rescue 2000 ang miapil sa parada.
Una nang gibutyag ni COCPO spokesperson Supt Mardi Hortillosa nga pabiling anaa sa level 3 ang seguridad sa syudad pagsiguro nga dili makapanghasi ang mga dautang tawo sa kapistahan sa syudad.
Samtang nag-kampeon ang Float #7 Uni Writing Instrument sa Float Competition.
Kini human nakadayeg ang mga hurado sa Golden Fish nga float nga giggamit sa maong establishimento.
Hisayran nga anaa sa 10 ka floats ang miapil sa parada nga gilakipan sa United Architects of the Philippines Cdeo Chapter, A Plus Paints, Kiwanis Club of Cagayan de Oro, Ms Cagayan de Oro 2018 (Beauty Wise), Barangay Agusan, Philippine Institute of Civil Engineers, MLhuillier Philippines, Support Zebra ug Palawan Pawnshop and Palawan Express Pera Padala.
Nakadawat usab sa pasidungog ang napulo ka tunghaan sa syudad human giila nga “Best Marching Band”.
Maoy napili nga gihataga’g pa-premyo ang Gusa Regional High School, Pilgrim Christian College, City High School, Liceo de Cagayan University Drum and Bugle Corp, Lumbia National High School, Misamis Oriental General Comprehensive High School, Agusan National High School, Puerto National High School, Lourdes College Integrated Basic Education Department, ug ang Pedro “Oloy” Roa Sr High School.
