Pormal na nga abrihan sa dakbayan sa Cagayan de Oro ang usa ka bulan nga selebrasyon sa Higalaay Festival ning siyudad karong Agosto 6 pinaagi sa usa ka grand launching sa mga aktibidad sa tibuok bulan.
Sumala pa ni City Tourism Officer Marky Jalapadan, pagasugdan ang maong grand launching pinaagi sa usa ka santos nga misa sa alas kwatro sa buntag nga sundan sa pagpakita sa opisyal nga promotional video ug sa simbolo sa pista nga mao ang Bulawanong Lamano.
Gilauman usab ang espesyal nga pagpresenta sa sikat nga singer nga si Darren Espanto ilalom sa segment sa ilang opisyal nga sponsor.
Labi pa gyud nga masadya ang mahitabo sa kagabhion tungod kay human sa usa ka mabulukong fireworks display, iduslit gilayon ang libreng konsyerto gikan sa sikat nga bandang Itchyworms isip opisyal nga pagsugod sa tibuok bulan nga kalingawan!
