CAGAYAN DE ORO CITY-Nakompiskar sa kapolisan ang tag-as nga kalibre nga klase sa mga armas nga gipanag-iya sa wanted person nga si kanhi Misamis Occidental board member Ricardo ‘Ardot’ Parojinog sa Ozamiz City.
Kini human gisilbi ni Ozamiz City Police Station commander C/Insp Jovie Espenido ang search warrants gikan sa korte batok Parojinog, Mina Luansing; Cheryll Hernani ug Joy Lumantas tungod sa pagbaton sa mga armas.
Miingon si PNP regional spokesperson Supt Lemuel Gonda nga kabahin sa nakompiskar gikan sa Dottie’s Hotel ang duha ka anti-tank rocket, duha ka RPG, tulo ka rifle grenade, 15 ka 12 gauge shotgun, 18 ka 9mm hand gun, walo ka .38 revolver ug usa ka unit nga M16 rifle.
Dumduman nga gilusob usab ni Espenido kuyog ang tropa sa Regional Mobile Force Batallion -10 ang MROP Security Agency ni Parojinog diin nakuhaan sa daghang armas sa maong lugar.
