CAGAYAN DE ORO CITY-Gikasuhan sa murder ang usa sa mga suspek sa kamatayon ni USTP Pres Dr Ricardo Rotoras samtang nagtagu-tago sa Makati City,Metro Manila.
Kini human unang nasikop sa kapolisan si Johnreal Abel Gumanay,33 anyos alyas Jan-Jan nga lumad nga taga-Zamboanga del Sur.
Miingon si Special Investigation Task Group Rotoras spokesperson C/Insp Mardi Hortillosa nga gihulat niini ang mando ni City Police Director Sr Supt Roy Bahian nga igawas ang kumpirmasyon sa kalambuan sa kaso.
Una niini,mismo ang usa sa mga testigo ang positibong mitudlo kang Gumanay nga mihimo sa pagpusil kang Rotoras ning syudad sa miaging Disyembre 2017.
Gani,naduso ang kaso sa piskalya ning syudad niadtong petsa 2 sa Pebrero ning tuiga.
Si Gumanay nasikop tungod sa warrant of arrest nga gilugwa sa korte gumikan sa kamatayon ni kanhi Ozamiz City Vice Mayor Rolando Romero tuig 2016.
Gitumbok usab si Gumanay nga mipatay sa brgy kapitan ug laing suspected drug pusher subay sa mando sa mga Parojinog sa Ozamiz City.
Nasayran usab nga kabahin si Gumanay sa sunod-sunod nga kasong mga pagpanulis sa mga pawnshop sa kauluhan,Cebu City,Butuan City,Pagadian City ug mismo dinhi sa syudad.
