CAGAYAN DE ORO CITY – Gusto ni City Mayor Rolando ‘Klarex’ Uy nga hingpit nang mabalhin sa lokasyon mga mas lu-ag ug dili bikil sa trapiko ang city hall building sa dakbayan.
Kini ang kusganong pagpalanog sa suporta sa mayor sa resolusyon nga unang gipasar ug gituki ni Konsehal Edgar Cabanlas kansa miani usab sa pag-uyon sa mayoriya sa konseho sa miaging regular session nila takdo usa ka semana na ning adlawa.
Miingon si Mayor Klarex nga kon nahimo kini sa ubang mga lungsod ug syudad sa pipila ka bahin sa Mindanao,nganong pakyas kining mahatagan sa katumanan sa mismong dakbayan.
Kini ang rason nga walay pagduha-duha ang paghatag suporta sa mayor sa maong sugyot nga gitakdang ipaubos sa makuti nga pagtoon sa upat ka komitiba sa konseho ning syudad.
