CAGAYAN DE ORO CITY – Gipatuman na sa mga opisyal sa Agriculture ug Veterinary Office sa syudad ang pag-ban sa importasyon sa mga baboy ug karne niini nga gikan sa Luzon ug Visayas area.
Gibutyag ni City veterinarian Perla de Asis nga ila kining gihimo isip precautionary measure aron mapakigbatukan ang African Swine Fever o ASF.
Dugang ni Asis nga bisan dili makatakod sa tawo ang ASF apan kinahanglan nga mahatagan proteksyon ang swine raisers ilabina nga miggamit sila’g dako nga capital sa pagbuhi sa mga baboy.
Samtang hugot nga surveillance ang ipatuman sa Veterinary Office sa 17-mil ka baboy nga gi-atiman sa mga backyard swine raiser sa tibook syudad.
Sumala ni De Asis nga gawas sa information dissemination, ila usab gipahigayon ang pagkuha’g blood sample sa mga baboy sa nagkadaiyang barangay sa syudad sa pagseguro nga nag-negatibo sila sa ASF.
Nanawagan usab si De Asis sa mga backyard swine raisers nga i-report gilayon sa ilang
buhatan kun ugaling aduna sila’y mga binuhing baboy nga nagsakit ug namatay.
