CAGAYAN DE ORO CITY – Dili did-an ni City Mayor Oscar Moreno ang pipila ka relihiyosong kalihukan nga naandam nga himoon sa pagtamod sa semana santa sa syudad.
Kini human mihangyo si Cagayan de Oro Archbishop Antonio Ledesma nga tugtan nga malibot ang ‘blessed sacrament’ gikan sa San Agustin Cathedral padulong sa pipila ka ospital diin naka-confine ang mga pasyente sa coronavirus disease.
Miingon si Moreno nga dili suliran kaniya ang pipila ka holy week activities kon masunod lamang ang health protocols ilabina sa social distancing sa katawhan nga moduyog niini.
Samtang bintaha alang sa katawhan sa Mindanao nga makalikay sa taas nga bahad nga matakbuyan sa coronavirus gikan sa mga tawo didto sa Luzon.
Kini ang nakita ni Moreno sa paglugway ni Pres Rodrigo Duterte sa lockdown sa Luzon hangtod sa Abril 30 ning tuiga.
Miingon ang mayor nga maayo ang gihimo ni Duterte ilabina nga wala pa miubos ang pagsaka sa mga positibong pasyente sa bayrus.
Dumduman nga nagbaton sa coronavirus positive cases ang Mindanao dihang natakdan samtang atua sa Metro Manila.
