CAGAYAN DE ORO CITY – Gihulagway sa Philippine National Police nga daw sama sa demonyo ang kinaiya nga gibatunan sa mga kadete nga mipatay kang Philippine Military Academy Cadet 4th Class Darwin Dormitorio.
Kini maoy paghulagway ni Baguio City Police Chief Police Colonel Allen Rae Co sa nahitabong pag-hazing kang Dormitorio sa sulod sa ilang akademya sa miaging semana.
Miingon si Col. Co nga makaluluoy kaayo ang kahimtang ni Dormitorio human ilang nadiskobrehan nga tinuyo ug dunay sagol nga kasuko ang pagkulata kaniya sa milabay’ng Agosto 17 ug gisubli pagka-19 bisan bag-uhay pa kini nakagawas sa ospital.
Gibutyag ni Co nga mismo si PMA Cadet 1st Class Axl Ray Sanupao ang nagmando nga kulatahon, sipa-on ug pakuryentehan si Dormitorio hinungdan sa kamatayon niini.
