CAGAYAN DE ORO CITY – Sutaon sa Regulatory and Complaint Board o RCB ang evaluation report sa National Bureau of Investigation o NBI sa pag-rescue sa pito ka menor de edad sulod sa usa ka hotel kauban ang duha ka Chinese National sa Barangay Cugman ning syudad.
Gibutyag ni RCB chairman Atty. Egay Uy nga ilang i-rekomendar nga pasirad-an ang hotel kun ugaling mapamatud-an nga nakasupak kini sa Children’s Welfare Code.
Dugang ni Uy nga tulubagon sa kadagkuan sa hotel kon adunay mga illegal nga gakahitabo sulod sa ilang patigayon.
Nalatid sa Children’s Welfare Code nga gi-require sa matag motel, hotel ug inn nga isulat sa log book ang mga pangalan sa menor de edad nila nga customers aron malikayan ang kasong human trafficking ug prostitution.
Hisayran nga gikasuhan na sa ”human trafficking” ug “child abuse” ang mga suspek nga sila si Shen Quiang, 26-anyos ug Li Qi, 27-anyos nga pulos naggikan sa China ug laing duha ka bayot nga nagsilbing bugaw.
