CAGAYAN DE ORO CITY – Nakadakop sa dugang duha ka residente ang kapolisan nga naghatag seguridad sa demolition team nga gisugo sa korte nga gub-on ang nabiling mga balay nga nag-ugbok sa Sitio Palalan,Brgy Lumbia ning syudad kaganihang udto.
Kini human gipadayon ug natapos na ang pagguba sa halos kadaghanan sa mga balay nga sulod sa mando sa korte nga ipa-demolis.
Miingon si Police Lt Col Evan Viñas,tigpamaba sa Cagayan de Oro City Police Office nga nasapon ang duruha ka sibilyan nga nanglabay’ng mga bato ngadto sa mga pulis nga igo lang nagpatuman sa maximum tolerance sa kasuguan sa korte.
Siya miingon nga mag-atubang sa kasong kriminal ang maong mga dinakpan nunot sa ilang pagsupak sa balaod.
Nagdumili una panganlan sa kapolisan ang mga dinakpan samtang kamulo gigukod ang ubang mga residente nga misukol.
Dumduman nga dunay lima ka pulis nga naglakip sa usa ka opisyal ang samaron kay gipangbato gihapon sa mga residente sa ikaduhang adlaw sa demolasyon kagahapong adlawa.
