CAGAYAN DE ORO CITY – Gi-ralihan sa libuang katawhan ang liderato sa 4ID,Philippine Army gumikan sa gitakdang pagpatuman sa court demolition order sa duha ka tituladong yuta sulod sa Kampo Evangelista ning syudad.
Kini human gipamugos sa 427 ka pamilya nga sila ang lehitimong tag-iya sa maong mga yuta diin 30 hangtod 50 ka tuig na sila nagpuyo sukad pa sa ilang unang mga kaliwatan nga kanhi usab mga sundalo sa nasud.
Sa maong prayer rally,gibatbat sa usa ka retired Army Col.Marcial nga ilegal ang himoon nga pagsilbi sa court sheriff sa demolition order gikan sa korte suprema rason nga mibarog sila sa pagprotehir sa ilang mga katungod kagahapong adlawa.
Samtang nagsilbi nang land military reservation sa halos 90 ka tuig ang gi-okupahan sa maong pamilya nga gimanduan sa korte nga ipabalhin gawas sa Kampo Evangelista,Brgy Patag ning syudad.
Miingon si 4ID spokesperson Lt Col. Francisco Garello Jr nga mismo si kanhi Pres. Manuel Quezon pa ang nagtumbok sa maong bahin sa kayutaan nga mahimong military reservation pinaagi sa iyang presidential proclamation nga gilugwa niadtong Marso 1937.
Namahayag si Garello nga dunay duha ka pamilya nga nakakuha sa titulo sa maong yuta sa tuig 1976 apan deklarado usab kini nga ilegal ug walay bili kay mipabor sa gobierno ang hukom sa korte pag-abot sa tuig 1978.
