Gihatagan og gibug-aton sa mga lider sa Kamara ang panginahanglan sa pagmintinar ug pagpalig-on sa party-list system pinaagi sa mga reporma aron masiguro ang tinuod nga representasyon sa mga sektor nga marginalized ug kulang sa tingog sa Kongreso.
Matud ni Lanao del Sur Representative Zia Alonto Adiong, dili angay hisgutan ang pagbungkag sa party-list system tungod kay klarong nakalatid sa Konstitusyon ang tinguha niini nga mahatagan og representasyon ang nagkalain-laing sektor sa katilingban.
Mipahayag usab si Tingog Party-list Rep. Jude Acidre nga ang tumong sa House Bill 9906 kay ang pagpahimutang og tin-aw nga mga sukdanan aron matino kung tinuod ba nga nagrepresentar ang usa ka party-list organization sa sektor nga ilang gibarugan.
Ubos sa maong balaodnon, bahinon sa tulo ka kategoriya ang mga party-list organization sama sa advocacy, sectoral, ug regional.
Matud usab ni ACT-Teachers Party-list Representative Antonio Tinio, magtakda usab ang balaodnon og mga kwalipikasyon alang sa mga indibidwal nga buot morepresentar sa usa ka partikular nga sektor, lakip na ang ilang kasinatian ug mga nahimo alang niini.
Samtang, gipadayag ni 4Ps Party-list Representative JC Abalos nga mahinungdanon ang mga publikong konsultasyon aron matino ang mga problema sa kasamtangang sistema ug makahimo og haom nga mga reporma.
Nipahigayon na og unang konsultasyon sa Butuan City ug gikatakda pa nga magpahigayon og susamang panagtigum sa Iloilo City ug Metro Manila aron makuha ang panglantaw sa uban pang sektor.
Lakip ang reporma sa party-list system sa mga prayoridad nga balaodnon sa Legislative-Executive Development Advisory Council (LEDAC). (raniel mahunyag)
