Gipasalig sa House prosecution nga ilang kontrahon ang bisan unsang pagsulay aron malangan ang impeachment trial batok kang Vice President Sara Duterte.
Matud ni House Prosecution Legal Spokesperson Atty. Benjamin “Jay” Tolosa Jr., wala na’y rason nga malangan pa ang trial tungod kay usa na lang ka impeachment article ang nahibilin batok sa Bise Presidente.
Nagpasidaan si Tolosa nga mahimong hinungdan sa kalangan kung magpresentar pa ang depensa og mga ebidensya bahin sa tulo ka kaso nga gibawi na o kung mamugos ang depensa nga gamiton ang tibuok 30 ka adlaw alang sa pagpresentar sa ilang mga ebidensya.
Mahinumduman nga niadtong bulan sa Oktubre kay gibawi sa House prosecution ang tulo ka impeachment articles nga dunay kalabotan sa confidential funds, grave threats, ug bribery.
Ang nahabilin na lang mao ang Article II nga nagtuki sa giingong unexplained wealth ni Duterte.
Gipahayag usab ni Tolosa nga bukas ang prosecution sa kasabutan kalabot sa mga ebidensya nga wala gilalisan aron mas mapadali ang proseso.
Sa laing bahin, gipanghimakak ni VP Duterte ang maong mga pasangil, samtang gikuwestiyon sa iyang mga abogado ang mga ebidensya nga gipresentar sa prosekusyon.
Gikatakdang sugdan sa depensa ang pagpresentar sa ilang mga ebidensya karong Lunes, Nobyembre 9. (raniel mahunyag)
