CAGAYAN DE ORO CITY-Aktibo na ang gitukod nga ‘human rights desk’ batok extra judicial killings o EJK nga gitoohang nahitabo sa mga lugar nga ubos sa Archdiocese sa Cagayan de Oro ug Camiguin.
Kini human nagkahiusa ang ubay-ubay’ng sektor aron dungan bantanyan ang himoon nga mga operasyon sa kapolisan ilabina ang pagpatuman sa anti-illegal drugs operations sa rehiyon.
Miingon si Cagayan de Oro Archbisop Antonio Ledesma,SJ nga kuyog sa Commission on Human Rights ug Intergrated Bar of the Philippines nga maong katukuran,maminusan ang sunod-sunod nga pagpamatay sa suspected drug pushers nga kanunay isulti nga misukol sa mga otoridad.
Sukad gisugdan ang anti-illegal drugs campaign sa rehiyon,kapin gatos ka suspected shabu pushers na ang napatay sa PNP operations tungod sa giingong pagsukol.
Samtang nalipay ang mga personahe sa Commission on Human Rights -10 sa gilusad nga desk batok sa extra-judicial killings sa tibook rehiyon.
Sumala ni CHR-10 representative Atty Pilipinas Palma nga mapasalamaton sila’g dako sa Archdiocese of Cagayan de Oro ug Integrated Bar of the Philippines ilabina nga dako nga isyu sa kasamtangang administrasyon ang human rights violations.
Asoy niini nga dili nila makaya nga mabatukan ang maong klase sa pagpangabuso kon wala ang tabang sa komunidad ug uban pang civic organizations.
Naglaum si Palma nga mas molawom ug monindot pa ang relasyon sa CHR, simbahan ug IBP pinaagi sa maong programa.Dugtong niini,mohatag sa suporta ang kapolisan sa gimugna sa simbahan, Commission on Human Rights ug Integrated Bar of the Philippines nga desk batok sa extra-judicial killings sa rehiyon.
Miingon si CdeO City Police Director Sr/Supt Nelson Aganon nga lakip sila nga nalipay sa maong paningkamot nga bantayan ang pag-abuso ug makalaum usab sila nga mosunod ang mga pulis niini.
Dugtong ni Aganon nga daan na silang naghatag kamanduan sa mga operatiba nga kinahanglang kanunay mosunod sa tukmang proseso sa matag himoong operasyon aron walay mahitabo nga pag pangabuso.
