Multahan sa dili mu-minos usa ka libo ka pesos ang mga residente nga masapon nga hugaw ang tugkaran sa tibook Barangay Bugo. Kini nga silot maoy tipik sa implementasyon sa Cleanliness Campaign sa konseho. Sa pagpatuman sa 𝗕𝗮𝗿𝗮𝗻𝗴𝗮𝘆 𝗢𝗿𝗱𝗶𝗻𝗮𝗻𝗰𝗲 𝗡𝗼.019, Series of 2024, o giila isip “𝗧𝘂𝗻𝗴𝗼𝗱 𝗸𝗼, 𝗟𝗶𝗺𝗽𝘆𝗼𝗵𝗮𝗻 𝗞𝗼” 𝗼𝗿 “𝗧𝗮𝗽𝗮𝘁 𝗞𝗼, 𝗟𝗶𝗻𝗶𝘀 𝗞𝗼, gimanduan ang tanang residente ug tag-iya sa negosyo i-mentinar ang limpyo ug kahindik sa tugkaran ug palibot, lakip ang mga kanal ug drainage. Ang mga masakpan nga hugaw ang palibot silotan sa unang higayon pinaagi sa sulat nga pahimangno (written warning), ug kung magpadayon ang kalapasan, silotan kini pinaagi sa multa nga dili molapas sa ₱1,000 o community service sulod sa tulo ka adlaw nga tag-usa ka oras kada adlaw. Ang maong silot nag-ugmad sa disiplina ug responsibilidad sa komunidad, nga gisuportahan sa Kalinisan sa Bagong Pilipinas Program sa Department of Interior and Local Government. Sa maong programa gimando sa DLGI ang tanan barangay nga magpasiugda ug malungtarong kalimpyo.
Hisayran nga lakip gisuportahan sa barangay ordinace ang Republic Act No. 9003 o Ecological Solid Waste Management Act of 2000 nga nagmando sa husto nga pagsegregate, pagproseso, ug pagdisposo sa basura aron maprotektahan ang kalikupan. Kini nga balaod nag-awhag sa mga barangay nga magtukod og Materials Recovery Facility (MRF) ug magpatuman og source-level segregation. Ang ordinansa sa Barangay Bugo nga “Tungod Ko, Limpyohan Ko” nagtuman niining prinsipyo pinaagi sa pagduso sa kalimpyo sa palibot ug pagmintinar sa drainage ug kanal. Ang pagsunod sa balaod makatabang sa pagpakunhod sa basura ug sa pagmintinar sa kahimsog sa komunidad.
Dugtong niini ang Republic Act No. 9275 o Philippine Clean Water Act of 2004 nagpanalipod sa mga katubigan sa nasud batok sa polusyon nga gikan sa mga panimalay, negosyo, ug industriya. Kini nagkinahanglan sa regular nga paglimpyo sa mga kanal ug drainage aron malikayan ang pagbaha ug pagkadunot sa tubig. Samtang ang Republic Act No. 8749 o Clean Air Act of 1999 nagtinguha sa pagmintinar sa limpyo nga hangin pinaagi sa paglikay sa pagsunog sa basura ug pag-regulate sa mga pollutant. Ang kalimpyo sa palibot usa ka paagi sa pagpanalipod sa panglawas sa katawhan ug sa kinaiyahan.
Suportado usab sa maong ordinansa ang Presidential Decree No. 1586 nga nagtukod sa Environmental Impact Statement System, kundiin nagkinahanglan sa assessment sa epekto sa mga proyekto sa katilingban. Kini nga sistema nag-awhag sa mga LGUs nga magplano sa mga proyekto nga dili makadaot sa kinaiyahan ug magpatuman sa environment-friendly nga mga inisyatibo. Ang Climate Change Act of 2009 usab nag-integrate sa mga estratehiya sa pagpakunhod ug pag-andam batok sa epekto sa klima. Ang kampanya sa Barangay Bugo usa ka konkretong lakang sa pagpatuman sa mga prinsipyo sa maong mga balaod alang sa malungtarong kalamboan.
