CAGAYAN DE ORO CITY-Hustisya ang gipangayo sa pamilyang Barangayan human gipusil-patay sa technician sa Brigada News FM station nga si Franklin Yabo sa Puntabon, Brgy Bonbon ning syudad.
Sumala sa asawa sa biktima nga si Joy Barangayan nga gusto niya nga mahataga’g hustisya ang kamatayon sa iyang bana nga si Antonio Barangayan.
Siya miingon nga gawas-sulod sa bilangguan ang iyang bana apan nagbag-o na kini tungod kaniya ug sa ilang mga anak.
Hisayran nga mabdos si Joy sa ilang ikaduhang anak sa biktima.
Samtang nagtoo ang igsoon sa biktima nga si Jenny Barangayan nga pagdumot ang motibo sa pagpatay sa suspek sa iyang magulang.
Si Jenny miingon nga dugay na nga gadumot ang suspek sa iyang magulang tungod kay kini ang gidudahan nga tiglungkab sa computeran sa suspek.
Apan giangkon ni Jenny nga may kaso na sa pagpangawat ang iyang magulang kay gawas-sulod kini sa bilangguan.
Giangkon usab niini nga may dala nga kutsilyo ang iyang magulang sa dihang gipatay kini tungod kay nangita kini’g iro nga iyang ihawon ug dili ang paghimo’g krimen.
