CAGAYAN DE ORO CITY – Gipangayo sa pamilya Galo ang dinaliang hustisya sa brutal nga kamatayon sa ilang 19 anyos nga anak-babaye nga gitoohang gitabanga’g patay sulod sa iyang kuwarto sa Zone 4,Sitio Dinogon,Barangay Sta Ana,Tagoloan,Misamis Oriental.
Kini human pabiling wala pa gihapon madakpi sa mga otoridad ang mga tinud-anay nga mga mihimo sa kremin sa miaging semana.
Gibutyag sa amahan nga si Rodrigo Galo nga labihan ka simpli ug responsible ang ilang anak nga si Lady Grace apan namatay lamang tungod sa daw demonyong binuhatan sa uban.
Una nang nagbaton sa mga bun-og sa lawas ug mga dinunggaban ang biktima ayha kini nadiskobre sa ilang kabanay sa miaging semana.
Si Lady Grace ang giduaw ni Most Rev. Jose Cabantan,arsobispo sa Cagayan de Oro kay sa buhi pa kini,nagsilbi siya nga sakristan sa Santa Ana Parish sa maong lungsod.
Samtang duol nang masulbad ang kamatayon sa 19 anyos nga kolehiyala nga gipatay sa wala pa hinganli nga mga responsibli.
Kini ang pasalig ni Misamis Oriental Police Provincial Office Director Col. Wilbur Salaguste sa kagustuhan sa pamilya ni Galo nga mahatagan na sa hustisya ang kamatayon niini sa daling panahon.
Miingon si Salaguste nga anaa na sa tulo ka persons of interest ang nahuptan sa ilang mga imbestigador hinungdang dili na madugay ang pagsulbad sa maong kremin.
Gani,kada-adlaw nga gisingil sila ni PRO -10 Director Brig Gen Jaysen De Guzman kabahin sa pagsulbad sa maong kaso.
