CAGAYAN DE ORO CITY-Gitawag sa Integrated Bar of the Philippines CdeO-Mis Or Chapter nga “hilaw ” ang report nga dili mahinayon ang eleksyon sa tuig 2019.
Matud ni IBP CdeO-Mis Or Chapter Pres Atty Ed Cuaresma nga kinahanglan pang usbon ang maong laraw sa mga magbabalaod.
Siya miingon nga mas maayo nga hulaton na lamang ang proklamasyon ni Pres Rodrigo Duterte may kalabutan sa estado sa piliay sa posibilidad nga mahisgutan kini atol sa iyang ikatulong State of the Nation Address.
Samtang nagtoo ang Citizens Watch of Good Governance o CWGG nga mahinayon ang federal govt kun ugaling ma-oktaba ang 2019 elections.
Sumala ni CWGG convernor Atty Antonio Soriano nga bisag balhinon pa ang sistema sa gobyerno apan magpabilin ang kurapsyon, walay mahitabong kabag-uhan sa nasud.
Siya miingon nga mas maayo nga hataga’g pagtagad sa Presidente ang kurapsyon ayha ang pagpasar sa federal govt.
Gibutyag ni Soriano nga mas misamot ang kurapsyon sa mga opisyal sa gobyerno atol sa Duterte administration.
Kini taliwala nga hugot ang kampaniya ni Pres Duterte batok sa kurapsyon.
Matud ni Soriano nga tungod sa estilo ni Pres Duterte nga tanggalon sa serbisyo ang mga corrupt officials, dako ang posibilidad nga magtigom og dako nga kwarta ang usa ka opisyal aron madala sa iyang pagbiya sa usa ka ahensya.
Hisayran nga sagad sa mga opisyal nga gilangkat sa pwesto ni Pres Duterte ang wala kasuhi ug igo lang gitanggal sa posisyon.
