CAGAYAN DE ORO CITY-Dili kampante ang Integrated Bar of the Philippines o IBP Misamis Oriental-Cagayan de Oro chapter sa kapas ni Majority Leader Vicente Sotto III nga pangulohan ang Senado.
Matud ni IBP Misamis Oriental Cagayan de Oro chapter Pres Atty Eddie Cuaresma nga wala niya kaminusi ang kaalam nga gibatonan sa senador apan mas maayo nga usa ka abogado o eksperto sa Batakang Balaod ang ihulip kang Sen Aquilino “Koko” Pimentel III.
Sya miingon nga daghang hagit ug bug-at nga isyu ang giatubang sa Senado sama sa hisgutanan sa Bangsamoro Basic Law (BBL), Pederalismo ug ang Constitutional Convention.
Nagtoo si Eddie Cuaresma nga dawat na ni Koko Pimentel ang plano sa iyang mga kauban nga hulipan sya sa pwesto.
Si Cuaresma miingon nga dili mahimo nga magdugay sa posisyon si Koko tungod sa iyang laraw nga subling magpapili sa umalabot piliay.
Dugang pa niini nga napasayo lang ang pagbiya ni Koko sa pwesto ilabina nga sa Oktubre pa unta siya mokanaug isip presidente sa Senado.
