CAGAYAN DE ORO CITY-Gitin-aw sa Integrated Bar of the Philippines Misamis Oriental-CdeO chapter nga dili mahimong mahitabo ang sugyot sa Department of the Interior and Local Government (DILG) nga i-diskwalipikar sa piliay ang mga anaa sa listahan sa narcolist ni Pres Rodrigo Duterte.
Si IBP-Mis Or-CdeO Chapter Pres Atty Eddie Cuaresma miingon nga kinahanglan pa nga moagi sa due process ang mga giakusahan base sa nakalatid sa balaod ug dili mahimong husgahan tungod lang sa maong listahan.
Gihagit ni Cuaresma ang DILG nga kasuhan ang mga barangay officials nga anaa sa narcolist sa Presidente.
Siya miingon nga mao lamang kini ang bugtong pamaagi nga ilang ma-disqualify sa 2019 elections ang mga anaa sa drug lists.
Matud ni Cuaresma nga mahimong dili makapapili sa umalabot piliay ang mga anaa sa listahan kun ugaling makonbikto kini sa kaso.
